Konfindustria, mbështetur në të dhënat e ardhura nga operatorët industrialë vlerëson, se ka filluar përshtatja më e mirë e punës së bizneseve në kushtet e reja të krijuara nga gjendja e jashtëzakonshme me rastin e epidemisë së Covid 19.   

Konfindustria vlerëson pozitivisht vendimin e fundit të ekzekutivit për njësimin e orareve të qarkullimit të njerëzve dhe aktiviteteve ekonomike dhe tregtare në vend. Njëkohësisht, me qëllim që të bëhet e mundur rritja e eficencës së punës të biznesve këshillojmë të shtyhet 1-2 orë afati fundor. Një shtrirje e tillë kohore bën të mundur edhe uljen relative të dendësisë së qarkullimit të qytetarëve, duke shërbyer drejtpërdrejt edhe në mbrojtjen e shëndetit.

Konfindustria mbështetet si veprimin e duhur publikimin nga ekzekutivi me akt ligjor të kategorive të bizneseve dhe industrive, që lejohen të kryejnë aktivitetin e tyre brenda fashave kohore të lejuara. Për sa më sipër kërkojmë, që sa më shpejt të ndërtohet me akt ligjor edhe protokolli i masave mbrojtëse të detyruara sipas cdo kategori biznesi për tu plotësuar nga bizneset gjatë procesit të punës. Një veprim i tillë është i domosdoshëm në rradhë të parë për tu patur si metodikë pune zbatuese nga bizneset dhe së dyti për të shmagur përplasjet e panevojshme subjektive me inspektoriatet dhe agjencitë e kontrollit. Gjithashtu, këshillohet të shtohet kategoria e bizneseve të lejuara për të punuar në hapsirat gjeografike të paprekura deri më sot nga epidemia.    

Konfindustria vlerëson, se marrja e masave përpjestimore shtrënguese në përballje me rrezikun e epidemisë është mënyra e vetme në uljen e faturës së rëndë financiare, që qytetarët dhe bizneset do të duhet të paguajnë nga pasojat e përballjes me epideminë. Sipas vlerësimeve janë më shumë se 30 milione/euro në ditë transaksione të munguara në ekonomi me pasoja të rënda në afatgjatë për bizneset dhe qytetarët.