Konfindustria mirëpret pranimin e kërkesës së saj nga Kuvendi i Shqipërisë për të mosmiratuar ndryshimet në projekt ligjin/pl e Kodit Rrugor për penalizimin automatik të qytetarëve për tejkalimin e afatit 30 ditor të siguracionit të automjeteve. Sipas pl të ardhur në Kuvendin e Shqipërisë parashikohej një penalitet i menjëhershëm, qe shkonte deri në 40 mijë lek për të gjithë zotëruesit e automjeteve edhe nëse nuk qarkullonin, mund të ishin të sëmurë, të ndodheshin jashtë vendit, etj.  Mbi 500 mijë zotërues të automjeteve ishin subjekt i penalitetit të parashikuar.

Ndërhyrjet absurde të kryera në pl, që krijonin kushtet për të penalizuar me qindra mijë qytetarë si dhe gjithë procesi i miratimit të tij të kryera pa debat publik, të paarsyetura në thelb, në kushtet e jashtëzakonshme të pandemisë si dhe në prag të zgjedhjeve të 25 prillit, kishin tipare të mirëfillta të “kapjes së shtetit/state capture”, forma më e lartë e korrupsionit. Është krejtësisht e papranueshme, që të arrihet të merren si nisma, të formulohen dhe të kalojnë me lehtësinë më të madhe pothuaj gjithë procesin e miratimit në drejtori, ministri dhe qeveri, akte ligjore në të cilat parashikohet, që institucione publike si p.sh Policia Rrugore në rastin në fjalë, të punojnë “ de facto” për interesa të biznesit privat.    

Konfindustria i kërkon Kryeministrit dhe Kuvendit të Shqipërisë, që duke u nisur nga rasti në fjalë i Kodit Rrugor,  të fillojë një hetim të thellë administrativ për të nxjerrë përgjegjësit institucionalë dhe individualë, që me shthurrjen, paaftësinë ose korrupsionin e tyre, kanë bërë të mundur dështimin e plotë të pothuaj gjithë hallkave/filtrave shtetërore përgjegjëse për procesin e draftimit në përgjithësi të akteve ligjore, me pasoja të pallogaritshme për interesin publik, shtetëror, ekonominë dhe qytetarët. Në rastin e tentativës së ndryshimeve të Kodit Rrugor përgjegjës të drejtëpërdrejtë janë hallka të Ministrisë së Brendshme, Ministrisë së Infrastrukturës dhe Energjisë, Ministrisë e Drejtësisë si dhe Autoriteti i Mbikqyrjes Financiare dhe Autoriteti i Konkurencës për organizimin “ kartel” të tregut të siguracioneve të detyrueshmë në vend.