Konfindustria shpreh shqetësimin për gjëndjen e vështirë të infrastrukturës rrugore të vendit e shfaqur dukshëm gjate sezonit turistik 2021 në vazhdim me pasoja të rënda financiare për biznesin, qytetarët, mjedisin dhe zhvillimin e ekonomisë kombëtare. Konfindustria kërkon ndryshim thelbësor të shpejtë të politikave të investimeve dhe mirëmbajtjes të rrjetit rrugor kombëtar, sipas parimit të vlefshmërisë ekonomike dhe jo klientelizmit, korrupsionit, shpërdorimeve, paaftësisë dhe populizmit të deritashëm.

Gjëndje e vështirë, vonesa të tejskashme dhe rradhë të gjata të mjeteve krijohen pothuajse cdo ditë në të gjithë akset kryesore rrugore të vendit drejt kryeqytetit dhe qyteteve kryesore si dhe qëndrave më të rëndësishme turistike të vendit.   

Në mënyrën më paradoksale të mundshme dhe në ndryshim nga cdo vend tjetër të paktën europian, akset rrugore kombëtare ngushtohen kur i afrohesh kryeqytetit të Shqipërisë. Shembull i qartë është rruga e Milot-Tiranë, që ngushtohet afër 10 km para hyrjes në Fushë Krujë dhe më tej deri në Tiranë, duke zhleftësuar dukshëm edhe vetë rëndësinë dhe investimin jo vetëm në Rrugën e Kombit dhe gjithë lidhjen kombëtare dhe ndërkombëtare të veriut të vendit. Gjithashtu, rruga Milot- Lezhë - Shkodër ka nevojë për zgjerim të shpejtë për të përballuar fluksin turistik si dhe ndërlidhjen me rrjetin ndërkombëtar nga Malin e Zi.  Mjaft problematike paraqitet standarti primitiv dhe i rrezikshëm i rrugës Tiranë -Durrës nga Ndroqi. Ndërhyrje e domosdoshme me ndikim të qartë ekonomik janë zgjerimi i aksit qëndror rrugor Rrogozhinë-Elbasan, mbarimi i Unazes së Tiranës dhe i aksit të julindjes Përmet- Kolonjë-Korcë. Vonesat dhe tejzgjatja e punimeve në Unazën e Vlorës dhe rrugën Kardhiq -Sarandë shkaktojnë pasoja të rënda për zhvillimin ekonomik të vendit, gjithmonë e më shumë i bazuar në industrinë turistike.

Ndryshime thelbësore dhe të shpejta duhet të kryhen edhe në politikat e mirëmbajtjes së sistemit rrugor kombëtar, që kanë treguar shenja të qarta të dështimit, të shpërdorimit të parave publike dhe korrupsionit.