Konfindustria kërkon, që në buxhetin e vitit
2022 të parashikohet ngritja e Fondit Antikrizë të Energjisë/FAE si zë i vecantë
dhe i jashtëzakonshëm për tu përballur me parandalimin dhe zbutjen e pasojave të
krizës së lajmëruar energjitike. Pjesë të fondit mund të jenë edhe burime të
ardhurash financiare nga përmirësimi i menaxhimit të deritashëm të kompanive
publike të energjisë. Qëllimi i krijimit të FAE është përdorimi për të shmangur
ose zbutur rritjen e cmimeve të energjisë dhe/ose politikat e mbështetjes
ekonomike të shtresave më të pambrojtura shoqërore.
Konfindustria vlerëson, se duhen përpunuar të
gjitha skenarët e mundshëm për të shmangur rritjen e cmimeve të energjisë
elektrike. Skenari i parapërgatitur qeveritar parashikon, që duke filluar nga 1
janari 2022, mbi 7700 biznese, që përbëjnë
thelbin e industrive shqiptare do të detyrohen të paguajnë energji elektrike me
cmime tregu, deri në 3 herë më të lartë. Bizneset do të përballen me rritje të
fortë të kostove të prodhimit dhe shërbimit, uljen e konkurueshmërisë dhe deri
në rrezikun e falimentimit dhe qytetarët me rritjen e pashmangshme të kostos së
jetesës. Prekja do jetë e dukshme sidomos për industrinë e materialeve të ndërtimit,
agropërpunimit, të miellit, qumështit, pijeve, turizmit, etj. Sot Shqipëria ka
20-50% cmime më të larta të energjisë elektrike për bizneset krahësimisht
vendeve të Rajonit.
Konfindustria vlerëson, se vetëm pas shterimit
të gjithë mundësive financiare dhe institucionale, duhet kaluar në skenarët e
rritjes së cmimit të energjisë elektrike. Në rastin e fundit skenarët e zbatuar
duhet të përmbajnë parimet përkatësisht të:- rritjes më të ulët të mundshme të
cmimit të energjisë, - shpërndarje të njësuar për gjithë kategoritë e
bizneseve, - mbrojtjen të shtresave shoqërore më të dobëta/konsumatorë fundorë.
Konfindustria ka përgatitur Paketën e kërkesave
dhe propozimeve të saj për përballimin e krizes energjitike, që do t'ja paraqesë
së shpejti ekzekutivit dhe vendimarrjes politike.
|