Konfindustria vlerëson, se është e paarsyetuar
dhe kundërshton vendosjen e akcicëz prej 6 lekë/litër e gazit të lëngshëm si dhe
heqjen e rimbursimit për industritë, të parashikuar në draft paketën fiskale
2022 nga Ministria e Financave dhe Ekonomisë. Aq më shumë, janë të pambështetura
propozimet e mësipërme, në kushtet e krizës së rëndë energjitike, që po kalon tashmë
vendi nga rritja e pakontrolluar e cmimeve të karburanteve dhe paralajmërimet e
rritjes së fortë në janar 2022 të cmimeve të energjisë elektrike për mbi 7700
bizneset kryesore shqiptare.
Konfindustria vlerëson, se në kushtet e një
tregu të karburanteve në Shqipëri jo konkurencial dhe me prani të qartë të karteleve
dhe oligopoleve duke filluar nga shërbimi portual, furnizimi me shumicë dhe
shitjet me pakicë, cdo rritje e ngarkesës fiskale do të shkojë drejtpërdrejt në
rritjen e cmimit fundor dhe kostove përkatëse për bizneset, industritë dhe
qytetarët. Shqiptarët sot përballen krahësimisht me cmimet nga më të larta në botë
të cmimit të karburantëve, shoqëruar me cilësi mjaft të dobët.
Gjithashtu, në kushtet e mungesës së plotë
të pranisë së agjencive publike rregullatore përgjegjëse dhe shkallës së ulët të
konkurencës në treg, ulja me 2 lekë/litër e akcizës së sotme të gazit të lëngshëm
për automjetet rrezikon të përfundojë si fitim shtesë për grupet oligopol të
karburanteve dhe gazit të lëngshëm.
Konfindustria, duke marrë shkak edhe nga përgatitja
e paketës fiskale 2022, përsërit kërkesën e saj drejtuar qeverisë dhe
vendimarrjes politike, që sa më shpejt të krijojë Entin Rregullator të
Karburanteve/ERRK si përgjegjës për cmimet dhe cilësinë e produkteve të tregut
të karburanteve dhe gazit. Tregu i karburanteve është më i madhi në ekonominë
shqiptare me mbi 10% të PPB dhe mbi 1.5 miliard $USD qarkullim vjetor. Krijimi
i ERRK është i domosdoshëm për të zbutur pasojat shkatërruese të krizës
energjitike për ekonominë kombëtare, bizneset dhe qytetarët shqiptarë.
|