Konfindustria i kërkon Kuvendit të
Shqipërisë të tregojë kujdes të vecantë në përzgjedhjen e kryetarit të
Autoritetit të Konkurencës/AK. AK deri tash, ka dështuar plotësisht në
përligjjen e arsyeve të ngritjes dhe mbajtjes nga taksapaguesit shqiptarë për
mbrojtjen e interesit publik nga grupimet antitreg. Grupimet antitreg janë
shkaku thelbësor, që ndalon zhvillimin e qëndrueshëm të ekonomisë kombëtare si
edhe korruptojnë dhe asgjësojnë vetë thelbin e demokracisë.
Përzgjedhja profesionale dhe pavarësia
politike e drejtuesve të AK është jetike në kushtet kur grupimet e tipit
kartel, oligopol dhe monopol, janë zotëruese në gjithë tregjet strategjike të
vendit. Një pjesë e madhe e tyre janë krijuar nëpërmjet vendimeve politike korruptive
të nivelit më të lartë të tipit të “kapjes së shtetit/state capture” dhe
mosveprimit në vazhdimësi të agjencive rregullatore të tregut, sikurse është
AK.
Rëndësia e mirëfunksionimit të AK shtohet
vecanërisht në kushtet kur aleati yne strategjik SHBA ka shpallur strategjinë
globale të luftës kundër korrupsionit. Në këtë kuptim Konfindustria mbështet
plotësisht deklaratën e Ambasadores së SHBA në Shqipëri Znj. Yuri Kim, se
“korrupsioni është kancer” i interesit publik dhe demokracisë.
|