Konfindustria kërkon ndëmarrjen e veprimeve
të jashtëzakonshme nga institucionet përkatëse të sistemit të drejtësisë dhe të
agjencive qeveritare për përcaktimin e shkaktarëve vendorë të ndëshkimit të
Shqipërisë nga Gjykata Ndërkombëtare në rastin Becchetti. Janë më shumë se 110
milion $ vlera e ndëshkimit financiar të shtetit shqiptar nga gjykatat ndërkombëtare
në rastin në fjalë.
Konfindustria vlerëson, se fatura
financiare e mësipërme, që shteti shqiptar do të duhet të paguajë, është me e
lartë se vlera e gjithë paketave të ashtuquajtura të ndihmës të marra së bashku,
të ofruara nga qeveria ndaj bizneseve dhe qytetarëve shqiptarë në rastin e
pasojave të krizës së Covid 19. Gjëndja bëhet edhe më e shqetësuese kur vlerëson,
se gjëndja e financave publike dhe ekonomia vendore, janë në gjëndjen më të vështirë
të paktën të njëzetëvjecarit të fundit dhe me kah të vazhdueshëm rënës në
vazhdimësi. Ekonomia parashikohet të ketë rënie prej 6-9% të PPB dhe borxhi
publik i plotë real ka tejkaluar nivelin e 100% të PPB. Gjithashtu, ndëshkimet
nga gjykatat ndërkombëtare lidhur me sigurinë ligjore të bizneseve, godasin
drejtëpërdrejtë dhe në afatgjatë seriozitetin e shtetit shqiptar përballë
tregjeve financiare dhe uljen e mëtejshme të konkurencës së vendit për tërheqjen
e investimeve të huaja.
Konfindustria vlerëson, se është e
domosdoshme dhe shtetformuese për sot dhe të ardhmen të përcaktohen në mënyrë të
plotë të gjithë qeveritarët dhe agjencitë publike, që me veprimet dhe mosveprimet
e tyre kanë sjellë ndëshkimin e ashpër ligjor dhe financiar ndërkombëtar të
rastit në fjalë.
|