Konfindustria, mbështetur në të dhënat e
ardhura nga bizneset e dëmtuara, shpreh shqetësimin për mënyrën e menaxhimit të
pasojave të tërmetit të nëntorit 2019 nga ana e qeverisë dhe pushtetit vendor.
Gjëndja paraqitet vecanërisht e vështirë në bashkitë e prekura më rëndë si Durrësi,
Tirana, etj. Mënyra e menaxhimit të pasojave të deritashme të pasojave të tërmetit
të nëntorit 2019, në shumë raste shënohet me paaftësi të theksuar, mungesa në aktet
ligjore përkatëse, që krijojnë kushte për subjektivizëm dhe korrupsion.
Konkretisht, në mënyrë krejtësisht të
pashpjegueshme, industrive të dëmtuara u kërkohet të ripaguajnë taksa për të dhënë
leje për rindërtim të ndërtesave të shkatërruara nga tërmeti. Sa më sipër kërkohet
edhe, nëse i gjithë procesi i rindërtimit do të kryhet pa asnjë ndryshim me
kushtet ndërtimore të objekteve, sikurse ishin para tërmetit të 26 nëntorit
2019. Pagesa e përsëritur e taksave për rindërtim arrin në shuma mjaft të
larta, që në kushtet e gjëndjes së rëndë financiare të bizneseve të goditura
nga tërmeti dhe pasojat e Covid 19, praktikisht bllokon cdo përpjekje të
bizneseve për rindërtim të objekteve të shkatërruara. Justifikimi nga ana e njësive
të pushtetit vendor për rastin në fjalë është, se në aktet ligjore të nxjerra
nga qeveria pastërmetit të nëntorit 2019, edhe pse kanë kaluar pothuaj 10 muaj,
nuk është parashikuar/“harruar”heqja e detyrimit të pagesës së taksës për rindërtim
të objekteve të bizneseve. Gjithcka më sipër bëhet edhe më e pakuptueshme, kur
gjithë kosto e rindërtimit merret përsipër nga vetë bizneset dhe pa asnjë ndihmë
financiare nga shteti. Pasojat e paaftësisë, subjektivizmit dhe korrupsionit të
ekzekutivit në rritjen e paarsyeshme të kostove të rindërtimit të bizneseve të goditura nga fatkeqësitë
natyrore, rëndojnë edhe më shumë gjendjen e vështirë ekonomike të tashme dhe rrisin
ndjeshëm mundësitë për falimentim të bizneseve. Përgjegjës kryesorë në rastin në
fjalë janë Ministria e Rindërtimit, Ministria e Infrastrukturës dhe Energjisë
dhe Ministria e Financave dhe Ekonomisë.
Konfindustria i kërkon qeverisë shqiptare të
përmirësojë në mënyrë sa më të shpejtë legjislacionin në fuqi për lehtësimin e
pasojave të tërmetit të nëntorit 2019 dhe nxjerrjen e përgjegjsive
institucionale dhe individuale të shkaktarëve të krijimit të gjëndjeve të tilla
të papranueshme si dhe marrjen e masave ndëshkuese përkatëse. Gjithashtu, kërkohet
vëzhgim nga afër ndaj njësive të pushtetit vendor për zbatimin e ligjit pa
subjektivizëm dhe korrupsion.
|