Konfindustria vlerëson pozitivisht
plotësimin së fundmi nga qeveria të kërkesës së saj për përjashtimin nga pagesa
të lejeve të rindërtimit të bizneseve të shkatërruara nga tërmeti i nëntorit
2019.
Konfindustria në fillim të shtatorit 2020,
duke marrë shkak nga shqetësimet e bizneseve, i kërkoi zyrtarisht Kryeministrit
Z. Edi Rama dhe ministrave përgjegjës për gjëndjen e papranueshme ligjore në
fuqi prej 10 muajsh. Bizneseve të dëmtuara nga tërmeti i 26 nëntorit u kërkohej
të paguanin për lejen e rindërtimit të ndërtesave të shkatërruara, sikur të
ishin leje fillestare.
Konfindustria në kërkesën e saj drejtuar
qeverisë arsyetoi, se gjendja ishte tërësisht në kushtet e absurdit. Jo vetëm
nga qeveria nuk ofrohej ndihmë financiare për bizneset e dëmtuara nga
fatkeqësia natyrore, por u kërkohej të ripaguanin për dhënien e lejeve edhe kur
bizneset i merrnin vetë përsipër shpenzimet e rindërtimit dhe sipas kushteve
njejta të lejes së mëparshme.
Mbështetur në të dhënat e ardhura pranë
Konfindustrisë tërmeti i 26 nëntorit 2019 shkaktoi dëmtime të pjesshme dhe të
plota në mbi 250 biznese kryesisht në qarqet e Durrësit, Tiranës, etj. Disa
industri të rëndësishme, që punësonin me qindra puntorë u shkatërruan pothuaj
krejtësisht me dhjetra milionë euro dëme të pësuara.
|