Konfindustria vlerëson, se projektbuxheti i
vitit 2021 në shtyllat kryesore të tij, paraqitet më optimist sesa janë mundësitë
e arsyeshme të ekonomisë shqiptare. Parashikimet e paarsyetuara të projektimit
të buxhetit, rrisin ndjeshëm mundësinë e dështimit në zbatim, rritjen e paarsyetuar
të barrës të borxhit publik, përdorimin me efektivitet të ulët të shpenzimeve
buxhetore, duke shtuar njëkohësisht edhe rrezikun e dhënies së një natyre
zgjedhore në kushtet e vitit zgjedhor 2021.
Konfindustria vlerëson, se parashikimi i
rritjes në 5.5% të PPB ekonomike, është i pasigurtë në kushtet kur:- rënia
ekonomike e vitit në vazhdim, sipas vlerësimeve edhe të institucioneve ndërkombëtare,
do të jetë më e lartë sesa vlerësimi qeveritar prej 6.1% të PPB, - kriza e
pandemisë është në vazhdim me pasojë rënien e investimeve të huaja,
remitancave, fuqinë konsumatore të brendshme, etj., - ekonomia shqiptare ka
problematika të thella strukturore, - nuk ka ndryshim të politikave ekonomike të
mbështetura në PPP, koncesione të paarsyetuara nga shkalla e efektivitetit,-
politika fiskale të paqëndrueshme me natyrë të pastër populiste si dhe – paqartësi
në masën e donacioneve të premtuara për rindërtimin e pasojave të tërmetit
2019.
Konfindustria vlerëson, se shpenzimet
buxhetore në kushtet e një krize të rëndë në vazhdim, gjëndjes së vështirë të tashme
të kategorive kryesore të biznesit si industria minerare, nafta, fasonët, shërbimet,
turizmi, etj. si dhe të ardhmes së afërt të pasigurtë, duhet të drejtohen në projekte,
që kanë rikthim sa më të shpejtë të investimit. Investimet e mëdha strategjike,
me pjesëmarrjen financiare të shtetit, përbëjnë rrezik të shtuar për qëndrueshmërinë
makroekonomike të vendit edhe kështu në gjëndje mjaft të vështirë nga barra e
borxhit publik, që ka prekur nivelin e 100% të PPB.
Konfindustria, mbështetur në sa më sipër kërkon,
që miratimi i projektbuxhetit në Kuvendin e Shqipërisë ti nënshtrohet një
debati të hapur publik dhe grupet e interesit për arsyetimin dhe përmirësimin e
shtyllave kryesore. Debatet me grupet e interesit kanë munguar deri më tash.