Konfindustria mbështet si një veprim të mirëpritur
vendimin e fundit të ekzekutivit për dhënien fund të monopolit dhe liberalizimin
e tregut të shërbimit të kontrollit të makinave.
Hapja e plotë e tregut për përfshirjen e mundshme
të qindra operatorëve/serviseve, shmangia e cdo mënyre të tërthortë
monopolizuese, shoqëruar me vendosjen me ligj të vlerës së sipërme të tarifave
do të sjellë shtimin e konkurencës me ndikim pozitiv në uljen e kostove,
rritjen e cilesisë së shërbimit dhe formalizimin e ekonomisë.
Monopolizimi i deritashëm i tregut nga
koncesionarë privatë tregoi qartë mungesën e eficiencës së shërbimeve të
ofruara, duke shkaktuar dhjetra milionë euro kosto në dëm të bizneseve dhe
qytetarëve shqiptarë në formën e tarifave të paguara, gjobave të marra dhe kohës
së humbur. Gjithashtu, monopolizimi i tregut provoi dhe paaftësinë dhe/ose
mosdashjen e agjencive qeveritare të kontrollit për mënjanimin e pasojave të
dukshme në dëm të qytetarëve, biznesit dhe ekonomisë kombëtare.
|